ادم سبقة مخلوقات من نفس النوع

ده تفسير الشيخ الشعراوى لآيه قالوا اتجعل فيها من يفسد فيها ويسفك الدماء وهتلاحظ انه أقر بوجود مخلوقات قبل آدم وان كإن الملائكة بتقول تاااااانى ؟!!

الانسان كان أصله جلدة حنفية

اه جلده حنفيه متستغربش ومتعترضش

وانت يعنى كنت اعرضت او فكرت او حتى قرأت فى الكتب او التفاسير لما قالولك ان حواء مخلوقه من ضلع ادم  ولا اخدت الكلام وسلمت بيه وخلاص يبقى ماشى تمام كده انت قولت بؤين حلويين

وكله كلام لا يمت للإسلام بصله من قريب ولا من بعيد و الأحلى من كده يقولك الزوجه خلقت من ضلع زوجها
ايه يا واد الحلاوة دى اهو ده التهجيص بعينه 

بقى من ضلع جوزها؟ اومال الحيوان المنوى والبويضه كانوا بيعملوا ايه؟ بنهرج احنا كتير صح؟

وندخل التهريج ده فى الدين وتلاقى الناس ياعينى الدمعه هتفر من عينيها فى كلام فاضى ولا ليه اى اساس فى الشرع ده كوم

والكوم التانى اللى يقولك الاسلام دين غلط ده بيقول كذا كذا
وينقل الكلام الفاضى وينسبه للدين رغم انه ولا ليه صله بيه اصلا

اغرب حاجه فى المجتمع الاسلامى انه بينقل ويتوارث ثقافته الدينيه بالسماع ولا حد بيقرأ ولا حد بيدرس....

واللى يحب النبى يزق ونمشيها فهلوه والمهم الى فى القلب وكله فى السبانخ.!!!
وعلشان محدش بيقرأ ولا حد فاهم اى حاجه فى اى حاجه وكله بيهجص فى الفاضى  ظهرت بعض النظريات العلميه ــــ لا اقصد بها الداروينيه ـــ وظهرت الاكتشافات التى اثبتت خطأ الموروث الثقافى السماعى المتداول فى المجتمع المسلم
فتحدث صدمه لدى الناس وانكار وتكذيب .....إما للنظرية العلميه .....او للموروث السماعى ....ويتطور الامر إلى الالحاد (اللادينيه)....

الانكار ده بيكون بناء على ما وصل للشخص من الدين زى ما قولت لا علاقه له بالدين ولكنه عبارة عن موروثات ثقافيه من قبل القصص الخيالى الذى لا اصل له فى الشريعه

يقوم يفتح الكتب المليئة بالاسرائليات يقولك اهو موجود فى الكتب اهو بيقول الانسان كان اصله جلده حنفيه اهو

جبت حاجه من عندى انا؟

ويفكر بجهل مركب (هو اعتقاد الشىء الخاطىء) وينسبه للدين ولا علاقه للدين بهذا الهراء الفكرى بلاش نحط حرف ال (خ) بدل الهاء

الحقيقه  ان معظم المسلمين يجهلون الصورة الصحيحه للإسلام وبالتالى يوم ما تقول انه غلط لازم تعرف انت لم تؤمن بالموروث الخاطىء الثقافى على فكرة الموروث ده كمان للأسف انتقل للكتب وغيرها
ومن ضمن هذه الاخطاء الشائعة التى لا وجود لها ولا أصل لها

هل أدم اول البشر؟؟؟
الحقيقة لا والسبب هو الآتى


قال الله ﴿قل سيروا في الأرض، فانظروا كيف بدأ الخلق )

تعالوا نتعرف كيف بدأ الخلق؟

قال الله للملائكة
وَإِذْ قَالَ رَبُّكَ لِلْمَلَٰئِكَةِ إِنِّي جَاعِلٌ فِي ٱلأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا وَيَسْفِكُ ٱلدِّمَآءَ

السؤال بيطرح نفسه كيف علمت الملائكة ان ذرية ادم ستفسد فى الارض وتسفك الدماء ان لم يكن هناك مخلوقات من نفس النوع قبله؟؟

ان قلتم الجن وهل هناك دليل على ان للجن دماء؟؟

حتى لو سكن الجن الارض هل من المنطقى ان تنسب ما فعله مخلوق لمخلوق اخر؟
يعنى ينفع تقول ان الاسد مفترس وكذلك الغزال؟؟ فما بالك ان الغزال اصلا لم يكن موجودا من الأصل !!!!!!!


يضاف إلى ذلك عدم علم الملائكة بالغيب قال الله ( لا يسبقونه بالقول وهم بأمره يعلمون)
وقولهم لله سبحانه (قالوا سبحانك لا علم لنا إلا ما علمتنا انك انت العليم الحكيم)

طيب هتقولى ان الله اعلمهم ان ذرية ادم ستكون مفسده وتسفك الدماء؟؟

الكلام لا يتوافق مطلقا مع حديث ان الله خلق آدم على صورته ومع كلمة خليفه فى الايه
بالاضافه انه لا دليل عليها كإنك بتقول ان الله قال لملائكته ان خلفيتى فى الأرض يسفك الدم ويفسد في الأرض وده تأويل فاسد ورفضه كثيرا من المفسرين

يبقى التسلسل المنطقى من الايات ان قبل خلق ادم كان يوجد مخلوقات من نفس النوع فى الارض 

ثم اخبر الله الملائكة انه سيجعل منهم خليفه
ثم خلق آدم

طيب فى دليل على الكلام ده؟؟
الآيه فى صورة السجده اوضحت هذا بكل بساطه
الَّذِي أَحْسَنَ كُلَّ شَيْءٍ خَلَقَهُ وَبَدَأَ خَلْقَ الإِنسَانِ مِن طِينٍ
ثُمَّ جَعَلَ نَسْلَهُ مِن سُلالَةٍ مِّن مَّاء مَّهِينٍ
ثُمَّ سَوَّاهُ وَنَفَخَ فِيهِ مِن رُّوحِهِ وَجَعَلَ لَكُمُ السَّمْعَ وَالأَبْصَارَ وَالأَفْئِدَةَ قَلِيلا مَّا تَشْكُرُونَ
ثم تفيد التعاقب مع التراخى يعنى فى زمن بين كل مرحله والتانيه
وده معناه ببساطه ان التسلسل ان البشر اتخلقوا من الطين

 بعد مده من السلالات عن طريق التزاوج بين الذكور والاناث حدث اختيار وتسوية ونفخ روح
وقوله تعالى
ٱلَّذِى خَلَقَكَ فَسَوَّاكَ فَعَدَلَكَ قال بن كثير أي: جعلك سوياً مستقيماً، معتدل القامة منتصبها
اولا الخلق ثانيا التسوية ثالثا العدل

ولما قال الله  إِنِّي خَالِقٌ بَشَراً مِن طِينٍ ، فَإِذَا سَوَّيْتُهُ وَنَفَخْتُ فِيهِ مِن رُّوحِي فَقَعُوا لَهُ سَاجِدِينَ 

خالق يعنى تفيد الماضى ولا المستقبل؟

الكلمه تفيد الماضى  

طيب هتقولى ان الله خلق ادم من طين  ص ايه 71 إذ قال ربك للملائكة إني خالق بشرا من طين

طيب مافى آيات تانيه بتقول انك انت اصلا مخلوق من طين خد عندك
سورة الحج آيه 5 فإنا خلقناكم من تراب
سورة الكهف ايه 37 ايه أكفرت بالذي خلقك من تراب
سورة آل عمران 59 إن مثل عيسى عند الله كمثل آدم خلقه من تراب ثم قال له كن فيكون الحق
وطبعا سيدنا عيسى كانت مرحله الحمل والوضع طبيعيه كباقى البشر
سورة طه ايه 55 قوله تعالى منها خلقناكم وفيها نعيدكم ومنها نخرجكم تارة أخرى

يبقى الآيات تحتمل التأويل بما لا يدع مجالا للشك ان المقصود بيها أصل خلق البشر اللى اثبت العلم ان جسمه مكون من العناصر الاسايه المكونه للتربه الطينيه وقد يقصد بها فكرة التطوير ان الارض والماء سبب الحياة والمسبب هو الله

ازاى يا عم اللى نعرفه ان سيدنا أدم اتخلق فى الجنه؟

أى جنه فى السماء ولا الأرض؟

الجنه التى تم ذكر سيدنا آدم فيها لم تكن جنة سماوية مطلقا والدليل

ان الله لما اخرج ابليس من الجنه لما رفض يسجد لآدم  ــــ أبليس وسوس لأدم وهو فى الجنه دى علشان يأكل من الشجرة

لو الجنه دى سماوية كان استحاله ان يدخلها ابليس مرة اخرى
دليل تانى
وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً
خدوا بالكم من كلمة الأرض

دليل تالت
وَقَالَ مَا نَهَاكُمَا رَبُّكُمَا عَنْ هَذِهِ الشَّجَرَةِ إِلاَّ أَن تَكُونَا مَلَكَيْنِ أَوْ تَكُونَا مِنَ الْخَالِدِينَ
ومعروف ان الموت وعدم الخلود من صفات الحياة على الأرض

ياريت الناس تقرأ وتتعلم وتبطل النقل السماعى ده وشكرا

والسلام ختام